f/ch An Chrannóg, Srath na Corcra, Doirí Beaga, Leitir Ceanainn, Co. Dhún na nGall. (074) 9532208

Baile - Cé Muid Féin - Achainí Sínithe - Achoimriú - Summary- Nuacht- Achainí - Naisc

Roinn na Gaeltachta faoi cheannasaíocht an Aire a choinneáil

Faoi láthair, tá an Roinn Gnóthaí Pobail, Tuaithe agus Gaeltachta ag caitheamh suas le €85.9 milliún ar chláracha Gaeltachta agus oileán. Sa bhreis air sin, tá €8.4 milliún ar fáil do ‘Chiste na Gaeilge’, foinse airgid a mhaoiníonn eagraíochtaí agus tionscnaimh ar nós: Bord na Leabhar Gaeilge, Gaillimh le Gaeilge, Gael-Taca srl.
Tá an Bord Snip Nua ag moladh gur chóir:

• deireadh a chur le cuid mhaith de na cláracha Gaeltachta agus oileán agus cúraimí Gaeltachta agus Gaeilge a aistriú chuig an Roinn Oideachais agus Eolaíochta.
• cúram na n-oileán a aistriú chuig an Roinn Comhshaoil, Oidhreachta agus Rialtais Áitiúil
• ísliú €49.6 milliún i gcaiteachas Gaeltachta agus oileán (58%) agus ísliú €1 milliún (12%) ar an Chiste Gaeilge
• líon na ndaoine atá fostaithe sa Roinn Gnóthaí Pobail, Tuaithe agus Gaeltachta a laghdú ó 160 go dtí 84, sin caillteanas 76 post (-48%) ina iomláine.

Ní aontaíonn muid gur chóir ciorruithe de 58% a dhéanamh ar chaiteachas Gaeltachta agus Oileán nuair nach bhfuil ach laghdú de 9.4% ar an mheán á mholadh d’earnálacha eile.  Tá sé sin éagórach. 
Tá sé fíorthábhachtach go mbeidh aire rialtais ann sa chomhaireacht agus é/í freagrach as cúrsaí Gaeltachta agus Gaeilge. Buille tubaisteach a bheadh ann dá n-aistreofaí cúraimí Gaeilge agus Gaeltachta chuig an Roinn Oideachais. Tá cúrsaí Gaeilge agus Gaeltachta i bhfad róthábhachtach le bheith i bhfolach i Roinn ollmhór mar sin. 

• Tá buiséad iomlán de €476M ag an Roinn Gnóthaí Pobail, Tuaithe agus Gaeltachta i mbliana. Caithfear €94.3M (20%) ar cheantair Ghaeltachta, ar oileáin, agus ar an Ghaeilge.
• Dá mbeadh an Roinn Oideachais agus Eolaíochta freagrach as cúrsaí Gaeilge, ní bheadh ach €43.7M ó bhuiséad iomlán de €8,746M á chur ar fáil don Ghaeilge agus don Ghaeltacht. Is ionann sin agus 0.5% de bhuiséad na Roinne Oideachais!

Cén aird a bheadh ag an Aire Oideachais orainne nuair nach mbeadh ach 0.5% de bhuiséad na Roinne sin á chaitheamh ar an Ghaeilge agus ar an Ghaeltacht?